Podzemni teatar

Piše i crta: Ivan Mihalić 31. 12. 2009.

Prolog – Još negda davno, bila je jena varoš kaj su je sikak zvali. Gda god su došli ovi z denešnje EU, pak i oni predi njih, si bi ju krstili kak je njima pasalo; Cris, Keres varoš, Kreutz i još koje kak dok im ni pala kmica na roletne pak su sami rekli naj se Varoš zove Križevec, a to bi kakti došle od «križ», ili od «križanje» kaj su se pri nam križale ceste koje su sikam vodile.
I ni to bila kakva god varoš. Je bormeš imela i Gornjega, i Srednjega, i Doljnjega varoša, pak je sam Kralj rekel – naj to bu Slobodna kraljevska varoš Križevec još A.D. 1252.
I Turci su pri nam bili, pak su i oni nekaj poharali, ali Varoš se navek zdigla, pa kak je rasla i prospererala, postala je glavna varoš Križevačke županije.
Gda je pak došla carica Marica, je rekla – dosti ste se karali međusobno – i naredila da se varoši ujedine, pak se nek zovu – Slobodni Kraljevski Varoš Križevci.

Lica: 1. Križevačka glista, 2. Gavran Garo – beskućnik, 3. Krtek Tomy, 4. Druga glista – prognanica, 5. Kesten Buby -plod, 6. Koren kestenov, 7. Oktet živih kestena, 8. Kestenov moljec, 9. Voluharica Suzana,
10. Štakor Miško, 11. Kresnica Zvezdica, 12. Podkornjak, 13. Pripovedač.

A je to bila lepa i ponosna Varoš. Pri nam je cvela i poloprivreda, i nauka, i zanatstvo a bormeš i kultura. Pak kak sme bili još i negda kulturni, su i naši vidli kak se to dela v Carevini, pak su još pred sto let v sred Varoši složili trga a na njega deli park koji se je zval Nemčičev.
I tak sme mi živeli zadnjih sto let dok i k nami ni došla kulturna revolucija i se poharala. Ostale je nekaj, tu i tam, ali dirnuti v kulturu, to ni stanovniki podzemlja nisu mogli prečkometi.
Podzemni teatar, ili kak bi po domačem rekli kazališče, diglo se na noge za očuvanje radnih mesta vu kulturi, i zaštitu svojega digniteta i kulturne baščine. Med njimi, glavnu je ulogu imela Križevačka glista.

Križevačka glista: (odrešito, ali i u revoltu pristojna)
– Kužiš, ono, ja sam glista. Podzemni radnik. Stalno rujem al vele da sem O.K.
Pardon, Križevačka kraljevska glista, sa 757-godišnjim kraljevskim poreklom. Od kad znam za sebe, moji su pretki obrađivali zemlicu i delali najkvaletetnešega humusa, pak je rasla travica i cvetiće, a takaj i kostanji. A onda su došli bageri, a z njimi i kamioni, pak su zemlicu otpelali i se poharali.

Gavran Garo: (luče čez rupu od kanalizacije)
– Garo, Garo! Ja sem pak ostal bez svog domeka, a japek i mamica su me napustili i otišli v drugo stanišče. Zrušili su im grad od drevljiča, a ja ne znam kaj bi i bum.

Druga glista: (križevačkoj glisti)
– Laže črni lopov pokvareni. Štel bi te rastožiti, pak gda bi ga došla tešiti, taj čas bi te poždrl. Ali je, si sme mi v nevolji. Pak znaš da sme i mi morali napustiti «Strosa» jer ni tam više ni zemlice spodi paviljona. Zadnji put gda sem štela videti sončece, z glavom sem vudrila v beton, pak zate imam ovu kvrgu na glavi. Ali je, moram zafaliti kaj si nas prijela na svoj grunt, pak makar i si skup gladovali.

I dok su gliste tak naricale nad svojom tužnom sudbinom, krtek Tomy je slušal z pristojne udaljenosti, pak im upadne v reč:

Krtek Tomy: (nježnim, šapčućim glasom)
– A kaj mislite da je meni lakše? Kam god rujem nemrem složiti krtičnjaka. Jemput z glavom vudrim v beton, drugi put se zapletem v nekšnu podzemnu letriku. Ni zimskoga sna nemrem predremati jer je vuni pretoplo, pak mi se ne dremle. A i kmica ni kaj je negdar bila jer na sakom koraku svetle prizemni lamapaši. Sva životinska družina se poplašila i emegrerala, a vi gliste kaj ste ostale tak ste mršave da i nemam apetita.

Koren kestenov:
– Najteže je meni. Odrezali su mi telo, pak im ni to ni bile dosti, nek su me gnječili z onim bagerima a jeden del su mi i zbetonerali. Niti sam ne znam jel sem živ ili mrtav. Imam jenu mladicu, ali nemam snage da potera.

Kesten Buby: (plod)
– Ja nisem sam, govorim vu ime svoje brače, a ima nas puno. Gda sme dozreli, saki si je našel mesto gdi se bu zakorenil. Ali i nas su pretumbali z bagerima, neke su otpeljali na drugo mesto i bojim se da bu bilo koji potiral mladicu. Tužna nam je sudbina.

Male po male, zebralo se tak veliko društvo nesretnika, a glas se je i dalje širil. Došel je i štakor Miško, pak se požalil da su mu zametali staru kanalizaciju, a novu da ne želi gristi jer je trda i ima nekakvi čudni okus. Čim su ga vidli, društvo se razbežalo na sve strane, a on se je klel da ima poštene namere, kak da je političar.
Križevačka glista se je prva pribrala, ali štakoru Mišku baš ni preveč verovala. Konzulterala se je s Drugom glistom i Krtekom, pak je iznesla zajednički predlog za preživlavnje Podzemnog kazališča. Od kak je nastal rusvaj, nije bile ni jene predstave, jer gladni i splašeni nisu ni mogli glumiti. Čak su im i binu zrušili, a dotacije su smanjili za pol, kakti zbog radi recesije.

Križevačka glista: (prisutnima)
– Dragi moji prijateli i neprijateli! Situacija je takva da glave treba deti skup, i početi misliti kaj sme čineči. Ja predlažem da održimo prosvedni skup za očuvanje radnih mesta, pak bormeš bi trebale delati i peticiju, pak bi ju si skup potpisali da je to tak. Saki ima pravo dojti i povedati svoje mišlenje.
Ali predi toga, treba je složiti DEKLERACIJU O MIROLJUBIVOJ KOEGZISTENCIJI I NENAPADANJU, a saki bi ju učesnik potpisal gda dojde na Skup. Jer kak znate, bile je da sme se i međusobno grizli, a to bi trebale izbeči zbog radi zajedničkih interesa.
Ja predlažem sebe za predsednicu kriznog stožera, a vi se slažete, pak nam je iti na posel.

I tak je Križevačka glista situacija zela v svoje ruke i počele su pripreme. Gavran Garo je dobil zadatak da obavesti se zaiteresirane, Štakor Miško je dobil zadatak da se si potpišu na Dekleraciju gda dojdu, a Druga glista je bila zadužena za medije, pak je trebala pozvati «Radio podzemlje», ali je mam rekla da domače Novine nebu zvala jer su one na «liniji» a tak i tak se objeve sa mesec dana zakašnjenja, a da to kulturna javnost mora znati mam. Još je nadodala da nebu zvala ni TV jer nas oni stalno ignoreraju kak da se pri nam ništ i ne događa.

Se su pripreme obavlene z volom i na vreme, a Križevačka glista se posebno zbigecala za tu svečanu priliku. Kak se i patri, na glavu si je dela kraljevsku krunu da se zna kam pripada i koja joj je denešnja uloga. Štakor Miško si je zvezal mašlin kravatlina, pak je zgledel čist pristojno, a če je primetil da nešče nebi potpisal Dekleraciju, same bi se nasmejal, a mogli bi i reči, pokazal zube.
I skup je počel z radom.

Križevačka glista: (svečano i glasno)
– Dragi moji supatnici, poštovani gosti i cenjeni mediji kojih uglavnom nema. Predi sega, nadam se da ste potpisali Dekleraciju, jer ona je garancija da bumo si preživeli ovaj naš Skup. Zato vas i lepo pozdravlam.
Si vi znate koje nas brige muče; zrušili su nam stanišče, se pretumbali i zbetonerali, a mi si skup sme ostali brez domeka svog. Neki su čak i zginuli zbog radi novih vidika, ali su tam deli druge, a nas su šteli satrti.
Zate vas prosim, povečte kaj koga muči, pak bume vidli kaj je moči napraviti.

Čula se je graja naroda, a si su šteli reči kaj ih muči v jeden glas. Križevačka glista je kričala – mir, mir, jeden po jeden - a kak je najglasneši bil Garo, njemu je dala reč:

Gavran Garo:
– Garo, Garo! Ja sem zastupnik. Dobil sem punomoč od preživelih kostanja na Trgu da njih zastupam, jer oni nemreju dojti ali buju i oni dali svoj doprinos skupu. Osnovali su «Oktet nostalgija» pak su rekli kak bi im bile drago da prvi put na svom nastupu zapopevlju Rekvijem za črlenu bukvu kaj je zadnja poginula na «Strosu».
I još su povedali da su čuli kak je jeden na Magištratu rekel kak i njih treba zatamaniti jer su mu, – ceteram, – kak šaka v oko.

Pak se je čula graja i neodobravanje, a Križevačka je glista pokušavala smiriti situaciju. Odmah su se složili da se otpopevele Rekvijem za mrtvu črlenu bukvu, i svi su nekak tužno pognuli gleve, a Garo koji je čez prele gledel v podzemlje, mogel je videti i gore i dole. Pak gda mu je Križevačka glista mahnula, on je mahnul Oktetu nek počme.
Dirigent je dal tonalitet, i prvo su počeli basi, onak stiha, pak se jakše kak da ide oluja. Onda je prevzel tenor, a si drugi su same repeterali – prava škoda, prava škoda, prava škoda… pak su čez eter počele stizati reči.

Drevo na «ŠTROSU»
Več duge pati
Ali od «struke»
Nišče da svati.

Kamen ga stišče
A vodice nema
Morti su znali
Kaj mu se sprema

I gda je mrlo
Su nikaj ni rekli
Morti na njemu
Buju i kostanje pekli.

Taj čas je na Skupu zavladala mrtvačka tišina, a preostali kostanji na Trgu narekali su skup z mačuhicama koje su nedavno posadili. Suze su tekle i v podzemlju, a Križevačka je glista prozborila – slava mu i vječna hvala za hladovinu kojom nas je štitilo godinama. Nastavljamo sa radom, pak da mam odgovorim zastupniku, našem Gari.

Križevačka glista:
– Garo, slobodno prenesi našem Oktetu da buju brez brige za svoju egzistenciju. Gradski su Japica na Magištratu donesli paragrafa koji veli da je ni smeti trupati drevlje kaj raste v zaštičenoj gradskoj jezgri ni pod koju cenu. A če bi se nešče usudil, da bi z njimi imel posla, a morti bi ga pelali i v rešt po kratkom postupku zbog radi devaštacije parkovne arhitekture i kulturnega dobra.
A sad prosim šte se još javla za reč?

Voluharica Suzana:
– Nisem imela nameru se javlati za reč, ali moje živlenje je v pitanju. A za te je nešče kriv, a ja znam i šte. Podkornjak. Črv lopovski, se je zgrizel i zatamanil kostanje nakon sto let, makar im je garancija za dvesto let postojanja. I ja sem pomalo grizla korenčiče ali čez održivi razvoj našega suživota i ni bile štete. Kulike sem ja pojela, oni su obnovili i živeli sme tulika leta v sreči i zadovolstvu. A oni, lakomnjaki jeni, se su požrli najenput, pak su oni gore imeli opravdanje da ih potamane.

Podkornjak: (srdito, vičuči)
– Laže, laže veštica jena podzemna. Mi sme grizli same tu i tam, a ne sako drevo. Pak sme i mi Božja stvorenja a od nečaga je treba živeti. I oni gore su lagali da su kostanji betežni i truli. To im je bile same opravdanje za njihove projekte, a da su ih šteli čuvati i zaštiti, platili bi im dopunsko zdravstveno osiguranje, pak bi ih lečili. Ima koje kakvih medicina da bi i mi morali odustati, makar nas to i živlenja koštalo. Ovak, i mi sme ostali brez radnog mesta.

Kak bi male smirila situaciju jer su napadi i optuživanja postali preveč jaki i neugodni, Križevačka je glista predložila nek Podkornjak sa svojom družinom ode na preživele kostanje, ali je on odgovoril da su tam sva radna mesta več zauzeta, a i oni jeju tek tulike da prežive. A onda je ruku zdigel Kostanjov moljac, kak da bi i on štel nekaj reči, pak je dobil reč.

Kostanjov moljac:
– Ja znam rešenje. Mi jednostavno morame muterati. Kak svinjska gripa. Dojde kak dojde, pak kad zmisle medicinu onda se preobrne v drugu gripu i nikaj joj nemreju. Pak si znate da su gore posadili nove kostanje, kak oni vele črlene, a nas zovu štetniki, pak da ih ne bi mogli napadati. Kaj god! Treba same probati, pak bute vidli da za jeno vreme vam buju fini kak i oni naši, domaći.
A delati peticiju? Ne znam kome. I oni gore su delali pak ništ od toga, a nazadnje, si su se razbežali.

Tu je odmah v reč uskočila Križevačka glista, pak je Skupu objasnila kakve je se rezultate peticija postigla. Kakti prvo, oni gore su rekli da probleme na koje su ukazali građani buju rešavali v hodu. Onda su hodili dva po dva ili jeden pak dva, pak su gledeli v prelo kaj su oni predi njih skopali. Potlam su došli drugi dva ili čak cela delegacija pak su se si čudili i jeni drugima čestitali kak bu to se lepe, a nikaj nisu ni vidli.

A tek onda su počeli menjati projekta v hodu. Odustali su od onog smešnog drevljiča kaj bi v teglinu mogle rasti, pak su posadili kostanje kaj črleno cveju. I to na mestu gdi v projektu ni zacajhano. Onda su deli kandelabre, namesto moderne rasvete kak je na «Strosu», jer ta nikak ne bi pasala na «Nemčiću». Bog im je pamet prosvetlil, a nigda ni kesno. Deli su i naše starinske klupe kak se i šika v starinskoj varoši. I još bi Križevačka glista nabrajala da ni čula Garo! Garo!.. a to je trebale značiti da bi on štel reč.

Gavran Garo:
– Mi se smililo ovo malo stvorenjiče kaj bi takaj štelo nekaj povedati, a nema snage da isprosi reč. Pak bi prosil v njezino ime da joj se reč dodeli – objasnio je Garo.

Kresnica Zvezdica:
– Meni nema spasa jer mi je duša mrtva. Strgali su mi krilca, polomili nožice, a i lampica mi je vgasla gda me je vudrila letrika. Gore su došli gradski Japica pak su tirali onoga ringlšpila, i onda je svetlile sto letričnih kresnica, a moja je lampica pregorela. Zanavek! Ni jutarnje rose nema na mojim travkama, pak sem žeđna, gladna i izgubljena.

Sve prisutne je obuzela neka tuga, a mala je Zvezdica zaplakala, tiho, jecajuči. Čak su suzu pustili i črleni kostanji, makar su bili u sukobu interesa.
Križevačka je glista još pitala če bi se šte javil za reč, a onda je nadodala da bi trebale složiti koncepiciju kak bi peticija trebala zgledeti.

V taj čas kak da bi strela Božja zružila z vedroga neba, nekaj je blesiknulo, a to je štakor Miško zabil zube jenoj glisti v vrat pak ju je progotnul. Štel je da bi i Križevačku kraljevsku glistu, al mu je kruna zapela v gebisu, pak je moral plunuti i krunu i nju. Skup se je razbežal na sve strane spašavajuči glave, a Miško je vikal da ni potpisal Dekleraciju, same je pazil da drugi potpišu. Pak kaj je tu onda čudnega. Ali više ga nišče i ni čul.

Same je mala kresnica Zvezdica i dalje plakala, a bila je tak drobna da ju ni nišče niti videl.