Gda bute ovo čitali mene vre ne bu med vami,
kaj su me scepali i složili vu cepanice.
I nigdo pod menom ne bu se vre slikal
za spomenek potlam venčanja pri Svete Anice.

Te bum kipece najlepše pamtila,
kak i za Božić gda sem svetašnju opravu oblekla.
I to bu mi zanje kaj nosim od sim
gda mi duša bu odletela vu dim.

 

 

Gda me je zgrejalo toplo sunčece  
ufala sam se da i ovo leto bum kak navek
još više zrasla i da bum odozgor mogla
videti dalše od celoga parka, i još i prek.  

Skup z menom tu su i ftičeki bili
vu gnezdima kaj su me sako jutro zbudili,
pak su me po granama škaklali,
dok su po njima sim, tam veselo skakali.

I jeno jutro predi zore
ftičeki vre nisu popevali,
nek su si skup nekam vu strahu odleteli.
I mam sem znala zakaj su zanemeli.

Potiho kak tati došli su vrtlari,
oni isti kaj su me celoga živlenja pazili,
pak su mi črlenom bojom na plećima
kak Jezušu križa namazali,
takaj i mojim prijatelima kostanjima.

Potlam su drugi došli z motorkom,
I najemput su me počeli rezati na živo.
I komaj sem dihala,
i nisem mogla zreči ni reč.

I dok je z mojih rana smola kak kerv curila,
sklopila sem grane kak ljudi ruke,
pak sem se i ja Jezušu za milost molila.

Klekla sem gda su su me skroz na skroz odsekli.
I još sem se ufala da to ni konec,
se dok me nije zadušil smrtni hropec.

Gda bute ovo čitali mene vre ne bu med vami.
Ne buju z mene napravili ni za jedra jarbola,
ni klupe, ni daske za hižu, a ni stola
i to me još više stišče do črnoga bola.

Žal mi je kaj bu otišla vu dim moja srebrena venčanica bela,
i kaj od bu od mene ostala samo hrpica vuglenoga pepela,
kak da nigdar nisem pri vami živela i istoga zraka dihala.